تجربتي مع ليزر فيليبس لوميا الاصدار العاشر

-
تجربتي مع جهاز الليزر فيليبس لوميا بريستيج الإصدار العاشر BRI956




Disclosure: I'm a participant in the Amazon Services LLC Associates Program, an affiliate advertising program designed to provide a means for website owners to earn advertising fees by advertising and linking to amazon(.com, .co.uk, etc)
**********



في دا البوست راح أنقل لكم تجربتي مع جهاز الليزر فيليبس لوميا الإصدار العاشر BRI956.

في السوق راح تلقو أرقام مختلفة للإصدارات BRI949 , BRI953 , BRI950 , BRI956. الجهاز نفسه فكلها لكن الاختلاف بينهم في عدد الملحقات والسعر فقط. أنا طلبت BRI956 ويحتوي على الملحقات كاملة (ملحق للوجه, الإبط, الجسم, والبكيني). طبعا دا الاصدار هو أفضل اصدار نزل بالسوق وهو اللي دايما يتكلمو عنه.

كنت باطلبه من ساكو بس وقفو طلبه مادري ليش, فطلبته من أمازون وجا نفس البوكس اللي بالصورة ويحتوي على:
الجهاز + الملحقات الأربعة + محفظة للجهاز + الضمان (سنتين) + كتالوج التعليمات + الشاحن.
 الجهاز أصلي وصنع في سلوفينيا وخلال بحثي ما لقيت نسخة تقليدية منه الى الآن.

قبل ما تشتري أو تستخدمي الجهاز الأفضل تتطلعي على الكتالوج لأنه يحتوي على كل شي تحتاجي تعرفيه عن الجهاز من الوصف, موانع الاستخدام, طريقة الاستخدام....الى استكشاف الأخطاء وإصلاحها.
لكن أهم شي تعرفيه انه كل ما كانت البشرة أفتح والشعر أغمق وأسمك, كل ما كانت النتائج أفضل وأسرع. يعني عموما حيناسب أغلب سكان الشرق الأوسط. 




وصف الجهاز:
  • يستخدم الجهاز تقنية الضوء النبضي المكثف IPL لازالة الشعر. 
  • يحتوي على 250 ألف ومضة كافية لعمل > 200 جلسة تستمر لاكثر من 15 سنة. 
  • يشتغل على (240-110) فولت. 
  • الاستخدام سلكي ولا سلكي. 


نظرة عامة على الجهاز: 
  • يحتوي على زر التشغيل/إيقاف التشغيل. 
  • زر مستشعر SmartSkin (علامة العدسة) لاختيار درجة كثافة الضوءالمناسبة للون بشرتك. 
  • أزرار درجات كثافة الضوء من 1 الى 5. 
  • زر التأكيد (علامة الصح) على اختيار درجة كثافة الضوء. 
  • علامة الشاحن فالنص لمعرفة كمية الشحن. 
  • مصباح الاستعداد الوميضي خلف الجهاز. 
  • زر الوميض أمام الجهاز. 




استخدامي للجهاز:
اتبعت تعليمات الكتالوج فكل خطوة. والخطوات بالترتيب:
  • أول حاجة أخدت شاور وحلقت شعري كله بالموس. والوجه شلت شعري بموس الفلامينجو. حسب الكتالوج تقدري تشيلي شعرك بأي طريقة: موس, شمع, براون, ماعدا الكريمات المزيلة للشعر، لأن المواد الكيميائية ممكن تسبب تفاعلات جلدية. 
  • بعد الشاور ما أحط كريم ولاحاجة على جسمي. بس أجففه كويس. 
  • ضغطت على زر التشغيل وشغلت الجهاز سلكياً. أنا أفضل استخدمه سلكياً لانه بيكون أسرع (يحتاج ثانيتين بين كل ضغطة) من الاستخدام اللاسلكي (3-5 ثواني بين كل ضغطة). 
  • ضغطت على زر المستشعر (علامة العدسة) عشان يختارلي الجهاز درجة كثافة الضوء المناسبة لبشرتي. والجهاز اختارلي درجة (4). لكن الأفضل انك تختاري رقم (1) أول حاجة ثم (2) ثم (3) ثم (4) لان اختيار الجهاز يمكن مايناسبك ويسبب ألم وحروق, وقتها لازم تقللي الدرجة. وممكن تجربي رقم (5) اذا حسيتي انك تقدري تتحملي وماحسيتي بألم, وكل ما كانت الدرجة أعلى النتائج حتكون أسرع وأفضل. يعني باختصار اختاري أعلى درجة تقدري تتحمليها. 
  • حطيت الجهاز على جسمي زي ماهو موضح في الصورة. لازم يكون ملاصق تماماً للبشرة لحد ما يصير لون مصباح الاستعداد الوميضي خلف الجهاز أبيض, وقتها تضغطي على زر الوميض. وتكرري نفس الشي لكل جسمك, ولا تنسي تحطي الملحق المناسب لكل منطقة. 
  • بالنسبة لمنطقة البكيني, اضطريت اقلل الدرجة ل(3) بسبب الألم, لكن ممكن يختلف بالنسبة لك. 
  • بالنسبة للوجه, حسب الكاتالوج لا تستخدمي الجهاز على الشفايف أو الجبهة أو المنطقة حول العين. 
  • أنا ماقدرت أشتغل بدون ما أحط علامات. أخذت محدد شفايف وبديت أحط علامات خفيفة عشان ماأسيب أي بقعة. 
  • احتياطاً: بعد ما أخلص ما أحط أي حاجة على بشرتي لحد ما يعدي يوم كامل, لأنه ممكن تكون فيه حروق بسيطة جداً ما أحس فيها. واذا حطيت كريمات أو مكياج وغيره ممكن تتفاعل مع الحروق وتسبب آثار جانبية. 



ملاحظات: 
  • أول أربعة جلسات تكون كل أسبوعين, وبعدها الجلسة الخامسة تكون بعد شهر, والجلسة السادسة بعد شهرين وهكذا. 
  • الجلسة الواحدة تاخذ مني تقريباً 3 أو 4 ساعات لأني جداً دقيقة وما أسيب أي جزء من جسمي. ممكن يختلف بالنسبة لك. 
  • أبداً لا تكرري على نفس المنطقة عشان ما تسببي أي آثار جانبية. وفنفس الوقت حاولي تكون الومضات جنب بعض بالضبط. 
  • لا تستخدمي الجهاز قبل الدورة الشهرية, لأن البشرة تكون حساسة وقتها. أنا ارتكبت دا الخطأ واستخدمتو قبل الدورة بيوم وسببلي ألم وحروق بسيطة. الألم كان بسيط زي ألم الحرق العادي والحروق أيضاً بسيطة وآثارها صغيرة لكن تشوه الشكل شوي. 
  • أحياناً بتطلعلي حبوب بعد الليزر فاستخدم كريم أكريتين تركيز 0.05% مرة فادني وما طلعتلي أي آثار جانبية. ممكن يختلف بالنسبة لك فانتبهي. 
  • اذا صار لون مصباح الاستعداد الوميضي برتقالي بدل الأبيض, معناته لون المنطقة غامق بالنسبة للجهاز. فحاولي تغيري وضعية الجهاز أو تشدي البشرة أو تفتحيها بأي وصفة لحد ما يصير لون المصباح أبيض. أيضا ممكن يصير لونه برتقالي اذا الشاحن بيخلص فاشحنيه.



النتائج:

فأول جلستين, درجة الكثافة اللي استخدمتها كانت (4) ما عدا البكيني (3). وباقي الجلسات زدت الدرجة ل(5) ما عدا البكيني (3). ولاحظت انو درجة (5) سرعت النتائج بشكل واضح.
  • أول جلسة: ما لاحظت أي نتيجة. 
  • ثاني جلسة: بطء ملحوظ في نمو الشعر. 
  • ثالث جلسة: اختفى الشعر من مناطق كثيرة فالجسم + بطء فالنمو + تساقط للشعر + خفة الشعر النامي. 
  • رابع جلسة: نفس نتائج الجلسة الثالثة مع زيادة كبيرة في اختفاء الشعر. 
  • خامس جلسة: اختفى 80% من الشعر أو أكثر. عملت الجلسة قبل 3 أسابيع, ولحد دحين مافي شعر في أغلب مناطق الجسم, واللي بيطلع خفيف جداً مايبان. أيضا منطقة الإبط صارت أفتح وأنعم. والوجه اختفى منه كثير وبيطلع خفيف مع اني باشيله بموس الفلامينجو برضه بيطلع خفيف.



باختصار:
دا الجهاز استاهل كل ريال دفعتو وكل دقيقة أخذها مني. النتائج ممتازة وانا جداً راضية فيه. وأنصح الجميع يشتروه خاصة المقبلات على الزواج اشتروه على الأقل 6 شهور قبل الزواج راح يشيل هم وعبء كبير. 

هذي أول مرة باستخدم ليزر لإزالة الشعر وما عمري جربت ليزر العيادات بسبب تكلفته (أفضل اشتري جهاز منزلي بألفين ريال ولا إني أروح للعيادة وكل جلسة أدفع فيها نفس المبلغ حتى لو نتائج العيادة أقوى) + غير الخصوصية والراحة النفسية مايحتاج أكشف المناطق الخاصة للدكاترة وغيرهم + أيضاً من ناحية النظافة ما أضمن أجهزة العيادات عكس جهاز الليزر المنزلي زي فيليبس يكون خاص لي واقدر أغير عدساته اذا أبي أحد ثاني يستخدمه.



لشراء الجهاز:
هنا فيديو عالانستاجرام لدكتور الجلدية د. طلال المحيسن بيتكلم عن أجهزة الليزر
أي استفسار بخصوص الجهاز أو طريقة الطلب في التعليقات.










تعليقات

إرسال تعليق